丁珮15字總結李小龍之死 兩大醫學權威推斷猝逝原因

無綫新聞資訊節目《真相猜‧情‧尋》一連3集的「李小龍猝死之謎」昨晚（23日）播出最後一集，香港首位藥物敏感醫生李曦及衛生署法醫科前主任顧問醫生潘偉明，綜合多份李小龍驗屍報告及醫療紀錄，重啟死因調查。

李曦醫生認為李小龍如真的如官方所言可能死於藥物敏感，應該在幾秒至幾分鐘內已病發，加上解剖報告顯示「氣管沒有收窄」，判斷李小龍並非死於急性藥物過敏。他說︰「我覺得如果佢真係因為藥物急性過敏致命，應該氣管收窄機會極高，應該做解剖會見到個氣管有收窄，但佢完全正常。無論臨牀上、病歷上，同埋睇完其他人講嘅描述過程，我真係覺得，肯定唔似急性藥物過敏。」

有30多年驗屍經驗的潘偉明同樣認為藥物敏感致死機會很低，他表示李小龍於離世前兩個月突然嘔吐、抽筋的病史，對其猝死極有參考價值。潘偉明醫生說：「睇番晒所有嘢，癲癇症真係可以解釋晒所有嘢。如果真係原發性嘅癲癇症，有機會引致一個突然嘅死亡。其實醫學文獻喺1990年代開始，都出現一個名詞叫SUDEP（腦癇不明原因猝死），通常呢啲情况都發生喺睡眠時間。」他指李小龍5月大病後返回美國做腦科檢查，檢查報告便暗藏先兆。他說：「診斷叫Convulsive Disorder，即係話一個抽筋嘅失常，但就未確診佢係癲癇症（現改名為腦癎症），因為通常第一次抽筋都唔會確診佢係癲癇症。之後美國嘅腦科專家都開咗一啲止抽筋藥畀李小龍食。」節目又提及當年救護員彭德生供稱，嘉禾負責人鄒文懷在救護車上告知李小龍曾患腦癇症。

方東昇團隊在節目尾聲透過曾與李小龍合作的陳福慶演員及李小龍會會長黃耀強的訪問，帶出李小龍不為人知的辛酸。陳福慶透露李小龍為了形象，病了也不想讓別人知道。他說：「佢話覺得自己係『猩猩』，冇晒私隱。死頂，淨係死頂，死頂佢又唔話畀人聽，有苦自己知。光環、名氣真係累咗佢。好似我哋唔舒服，嗱嗱聲睇醫生，咳梗係即刻飲咳藥水，佢唔畀人知道呢啲嘢㗎﹗」黃耀強感慨李小龍追求極致功夫：「由《唐山大兄》返嚟之後到《龍爭虎鬥》，李小龍不斷消瘦，佢嘅消瘦唔係有病，而係佢不斷練。李小龍喺《龍爭虎鬥》嘅肌肉，咪『剝皮田雞』囉，冇脂肪、零脂肪，你見到佢不斷去追求，去到一個極致。」

半世紀以來受盡千夫所指的丁珮到今天仍充滿感慨：「佢嘅死就係我嘅生，佢如果唔死就冇我今日，我唔會得道，唔會認識自己，唔會受咁多苦難。邊個叫我鍾意佢，邊個叫佢喜歡我，佢鍾意我先㗎嘛。佢如果唔鍾意我，就唔會有呢啲事喇嘛。」談到李小龍的離世，丁珮以15字總結：「呢個唔係你嘅意，唔係他嘅意，係天意！」

（即時娛樂）