旺角電腦中心變死場？ 網民分析「腦場」風光不再原因｜網上熱話
本地零售市道結業潮未止，除餐飲食肆接連離場，有網民發現傳統電腦商場亦面臨危機。近日，有網民發現旺角電腦中心內部「十室九空」景象，感嘆「估唔到有咁多舖頭倒閉」，引發網民討論，並歸納以往傳統「腦場」走向衰落的原因。
有網民近日在Facebook群組發布相片，可見旺角電腦中心多間商店已拉閘或貼出招租告示，以往人頭湧湧的「腦場」變「死場」，樓主形容「好耐冇行過旺角嘅電腦商場，估唔到有咁多鋪頭倒閉」。對於有網民質疑拍攝時間，樓主回應「係夜晚8點幾路過嘅時候拍的，睇到好多店鋪都掛著招租，有啲則人去留空。」
▼▼▼旺角電腦中心▼▼▼
資料顯示，位於奶路臣街的旺角電腦中心，自1991年開業至今有34年歷史，樓高3層，是旺角首間大型電腦主題商場，地下長期曾設展覽攤位介紹電腦產品，高峰時期有70間商戶，售賣電腦硬件、軟件及「砌機」維修等服務，曾是砌機發燒友必到熱點。
帖文引發網民熱議，感嘆旺電成為「遺址」、也有人懷念過去「100元4隻軟件的日子」、「當年1995-2010，電腦砌機最旺時間」、「往事只能回憶」、「疫情後執晒了，之前好旺的」、「旺電係呢一年執得快」、「好快變夾公仔場」。
越來越少人砌機 「問問自己幾多年無買過電腦？」
有網民指旺角電腦中心變死場有多個主因，隨著智能手機及平板電腦功能強大，傳統「砌機」電腦需求受衝擊，「問問自己幾多年無買過電腦？手機、平板日常基本夠用」、「越來越少人砌機，十個朋友買電腦七個買手提，二個買pad當電腦，可能很一個砌機來打機」、「全部做野用電話，平板手提電腦行ai方便好多，唔會用大機做，打機的人全部用平板和電話，社會變遷電腦業冇得做」、「手機及平板嘅娛樂幾乎可取代電腦，所以肯定少咗好多人買電腦」、「電腦時代已過，現在是AI時代了」。
▼▼▼旺角星際城市變「相機天堂」▼▼▼
同區星際城市 成內地客「相機天堂」
另有網民指出，旺角鄰近另一「腦場」星際城市近年轉型「翻生」，在小紅書追捧下，店舖靠轉型即影即有相機及相紙、菲林相機以及復古數碼相機吸引大量內地客，搖身一變成「相機天堂」，更令位置較不利、未有跟隨轉型的旺電「死得更快」，「D舖去曬星際」、「隔離星際人多到爆，似係管理不善囉。」
網上購物盛行「實體店冇得做」
亦有人指出網上購物進一步分薄傳統「腦場」客源，「實體店已冇得做，黃金，高登都執好多」、「眼見好多實體舖執，但係好多網上砌機都幾好生意！只係轉左型，始終香港做生意最貴係租」、「網上太方便！又平仲要送到屋企樓下」、「資訊網絡發達，無得劏水魚咪執囉」、「上淘寶買算啦，又平又方便」。
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)