黎展峯出道4年首開騷 變緊張大師 收百包撈麵嗌崩潰

出道4年的「緊張大師」黎展峯（Andy）日前迎來人生第一次音樂會！今次Andy跟張馳豪（Aska）孖住上，舉行《Andy X Aska PLAY》音樂會。這邊廂Andy在台上自彈自唱，兼大騷健身成果，那邊廂台下粉絲送了百包印尼撈麵，他不禁笑說：「喼弗1個月即刻破功。」

人生首個音樂會，Andy緊張到爆：「好緊張！因為屬於自己第一個騷，好多嘢都想準備到最好，再加上我係鍾意諗好多嘢嘅人，好容易令到自己騷前好大壓力。」

這次音樂會，由選歌、rundown到styling，Andy都落力參與：「再加上每日去練歌練琴、做gym，係有啲chur，不過好值得。」Andy指自己「諗嘢多過食飯」，好在音樂一響即刻放鬆：「不過開騷後，聽到大家嘅反應，令我放鬆晒，不斷話畀自己聽要享受呢一場騷。」

首次開騷Andy坦言沒有蝦碌事，反而有不少爆笑時刻：「最深刻就係收咗100包印尼撈麵。我本身好鍾意食，但為咗呢場騷，努力keep fit咗1個月。因為開騷前要谷肌，我特登食咗印尼撈麵攝取碳水，點知show day當日，fans為咗慶祝我good show，就送咗成100包印尼撈麵畀我！」他笑言感謝粉絲的心意：「早知話自己鍾意食魚子醬啦！」

至於最感動、最喜歡的一part，Andy表示在唱《免費升級》這首歌，「呢首歌陪伴住我或者好多人經歷低潮，能夠帶住呢隻歌，去到更大嘅舞台表演，真係好感動，亦提醒住自己，要繼續更加努力，每一次都要畀大家見到升級咗嘅Andy！」

（即時娛樂）