【龍叔睇戲】 影像凌厲演員出色 │ 睇人發惡夢 睇完發惡夢

之前喺社交平台扭晒穚玩marketing嘅《贖夢》，前日終於正式上晝。張家輝今度第4次執導筒，龍叔叔都幾鍾意佢之前嘅《盃蘭神功》同《陀地驅魔人》，覺得佢掌握驚嚇節奏唔錯，今次唔係講鬼，但用發夢去包大穚，確實可以玩得更天馬行空一啲。家輝喺訪問都講過，花左好多資源去搞靚啲Visual，龍叔叔係抱好大期望入場畀人嚇一鑊的。
.
唔係鬼片但驚嚇過鬼片

果然無令龍叔叔失望，前半段大量鋪陳唔同角色嘅夢境黑暗面，場境設計好有心思，例如起首許恩怡嗰幕血中盪鞦韆、張家輝畀燒炭鬼追、阿婆甩頭猛撼車窗等等，令龍叔叔勾起2000年《移魂追兇》(The Cell) 玩潛意識嘅觀能震撼，被嚇得好Q爽！
雖然突如其來嘅Jump Scare都有唔少，但導演算係平衡得唔錯，唔似啲B級鬼片一味撲出黎嚇你咁低手，視覺上亦比彭氏兄弟類似夢境營造嘅《鬼域》更震撼。加上時代廣場英皇嘅音效相當讚，每每都讓人有透唔到氣嘅壓逼感，睇到觀眾好似不停畀鬼責咁Heavy：到底醒未呀？
.
演員入戲直撼觀眾心房

另外讓龍叔叔同樣驚喜嘅，係多位演員都表現出色，許恩怡扮意外大肚嘅惶恐學生妹、袁富華身兼慈父同衰老公嘅極端、較眼前一亮嘅醫生助手朱晨麗，幾機智冷靜 (同埋都幾靚)等等，至於Brian李凱賢，無爆一兩句粗口始終有啲唔慣，較特別一幕係一堆人key晒佢光頭鬍鬚佬個樣，追住主角跑，觀眾有笑聲，但其實大家心底都有一份寒意，發惡夢咪就係咁架囉！

張家輝前半段癲癲傻傻，劉俊謙沉實內斂，畀一出場就癡線嘅陳法拉搶走晒焦點。反而身兼三職嘅張家輝，唔知係咪要顧太多野關係，無左《証人》、《激戰》嗰份演出神采。好彩到中後期背後故事開始浮現，張同劉情緒陸續大爆發，觀眾好順利成章投入到兩位角色嘅黑暗面同掙扎位，成條穚去得好流暢唔會夾硬黎，張家輝導演功力又大進一步了。

較可惜係神秘客串嘉賓定位有啲夾硬黎，話佢有入夢功能但對劇情推進近乎零，都係一貫chok樣耍帥，到結尾彩蛋再出場簡直讓觀眾笑左出黎。都好嘅，學龍嬸嬸話齋，套戲睇到個人好壓抑，臨尾笑一笑算係無咁辛苦嘅。
.
戲名唔夠吸引但絕對貼題

至於劇情，唔算係好複雜扭穚，難消化嘅肯定係惡夢或者心魔帶黎低氣壓，龍叔叔睇完覺得戲票物有所值，誠意滿滿，觀能剌激100分。不過周五晚銅鑼灣戲院新上畫，大概都只係坐左半滿，
可能好多入場觀眾同龍叔叔一樣，唔係幾鍾意《贖夢》個名，太過文謅謅了，令人無乜入場意欲，不過睇完套戲，個名又確實改得好貼題，你叫龍叔叔再諗都係會改番《贖夢》呢個名，希望套戲靠口碑帶出後勁，整體票房唔太差就好了。
.

PS.
好懷念呢堆對白，一睇就有畫面，可借張家輝講過演唔番呢啲角色了。

「如果唔係呢期興環保，我就掟你個冧家剷去炸豬油！」
「oh~~oh oh oh ，我畀碌蕉你含！」
「你唔搭我咪唔食囉！」
「家咩姐啫？我姓甘家嘛！」