夏韶聲曾因一首大熱歌遭老闆解僱 失業8個月陷低潮

夏韶聲（Danny Summer）日前接受新城《One Music Corner壹角樂》錄音訪問，暢談跨越半世紀的音樂生涯，又披露即將在8月舉行的紅館演唱會細節。節目主持梁兆輝（Brian）以「樂壇變色龍」形容他的多變音樂風格，夏韶聲笑稱：「你漏咗一個名，好多人都叫我陳近南！」重提他在1998年參與無綫劇《鹿鼎記》，飾演「陳近南」一角。

談及音樂起點，夏韶聲回憶：「我1960年代喺歌廳彈bass開始，然後打鼓，有啲樂器未學識都要被迫上台，總之百搭就多啲機會。當年冇諗過將來要紅或者做Super Star，只要每晚返工出糧畀錢我，我又可以畀到家用就做。」他特別提到1970年代上《歡樂今宵》演出的趣事︰「雖然第一次腳都震，但上電視係好大件事，狄波拉、薛家燕都喺度，我話畀自己聽千祈唔好跌支咪落地下，過咗呢晚之後，行出街都飄飄然，但就只係飄咗一陣。」

夏韶聲亦曾遇過低潮時，1979年憑《童年時》成名後遭餐廳解僱。他說︰「老闆話《空凳》歌名意頭唔好，話冇生意，所以自己都冇得撈，我都估唔到，之後失業咗8個月。」談到相隔25年再登紅館舞台，演唱會名稱為《Last Summer》，Danny解釋：「我唔係告別，但『Last Summer』呢個名大家去意會，將來仍然可以見到我喺唔同層面，今次就畀我做一個好有體面嘅演唱會畀我嘅粉絲。」

（即時娛樂）