VIVA「集體回憶治療班」 召喚FFx Christy跳《Sugar Baby》
英皇女團VIVA的「女團聯乘企劃」繼續玩到盡，繼As One、Super Gir及HotCha後，應網民強烈要求召喚到MK Pop「傳奇女團」FFx成員Christy出山，VIVA更與Christy一齊跳返FFx成名作《Sugar Baby》。
講當年有指《Sugar Baby》的MV製作山寨，只是用了九百元，Christy則反擊說：「當時係放學趕過嚟，化完妝一出去，嘩！所有嘢望落去好犀利，set晒路軌、set晒cam，係低成本製作嘅，我完全承認，但係啲人話九百蚊拍MV，我就唔知邊度聽返嚟， 九百蚊拍到啲咩？可能化一個妝？我都唔知。」15歲入行做女團的Christy話純粹覺得「好似幾得意」就去試，坦言完全不後悔：「我哋完成晒所有女團里程碑㗎！出咗歌、好多fans、唱tour、開演唱會，每一件事都對我嚟講都好有意義！」
講到最辛酸時期Christy指曾經要對住空氣表演：「得一兩個人經過會停留，但佢哋唔知我哋係邊個。」但最感動是有次演唱《Sugar baby》唱到副歌時竟然全場大合唱。去到大學表演，大合照全部學生衝到台上：「咁仲有乜嘢好唔開心呢？原來我哋唔係好差咋喎。」她指現時重看當年MV也完全不會尷尬：「有啲情意結嘅，呢首歌唔係一首歌，對我嚟講係好重要嘅嘢，冇任何嘢可以攞得走呢件事。」
最後Christy眼眨淚光隔空跟FFx其他成員喊話：「如果你睇到呢條片嘅話，我希望你哋睇到呢條片嘅時候係幸福嘅，回想返我哋以前嘅經歷。」VIVA的「女團聯乘企劃」來到最終章，坦言製作這個女團聯乘系列，從中學習很多、亦感受很多：「佢哋經歷過嘅、分享過嘅，都係我哋依傢正正經歷緊。就好似我哋首歌《不夠浪漫的我們》，女團從來都唔容易做，但團魂永遠都喺度。」
東網網站 : https://on.cc/東網Facebook專頁 : https://www.facebook.com/onccnews/