女神配對計劃｜劉偉強陳昇跟李芷晴約會 「怕醜仔」Jacob憑《愛‧回家》力挽狂瀾

無綫《女神配對計劃》周日（6日）晚播出第5集，本集與組員「三角枱約會」的女神是李芷晴（Stephanie/Step）及羅毓儀（Yuki）。

李芷晴組的三位求愛勇士分別為年薪超過80萬的「怕醜仔」金融分析師林焌堯（Jacob）、陽光型保險經紀劉偉強（Isaac），及貼心西裝店老闆陳昇（Jaden），Step在是次約會中公開3大擇偶條件。

3人之中以Jacob最搶鏡，全程製造勁多Dead air，還數度拒絕給女神視線！未知是否含蓄表現反而令Step對Jacob頗受落，明知「我哋都係繼續Dead Air」，但仍忍不住連環大讚Jacob「好搞笑」。

當Jacob發現自己對Step語塞時，不但問對手「有冇嘢問」，還撩對手Jaden傾偈，令Step大開眼界：「佢開始撩你哋喇」，說完更豪邁大笑！

面對Jacob的「消極」態度，主持兼媒人林盛斌（阿Bob）表現肉緊又激氣，在第一回合結束後，阿Bob向Jacob訓話：「Jacob，你嘅時間嚟㗎嘛，你問佢哋有咩想問？你冇嘢呀嘛？等陣佢哋有機會啦！」當見到Jacob反高潮地轉撩對手傾偈時，阿Bob直頭激動到掟耳機兼到約會現場救駕。

雖然Jacob追女仔零板斧，但憑真心及努力取勝！Jacob知道自己入了芷晴組後，狂煲Step在《愛‧回家》的戲分、還大讚Step飾演的Elaine好好看，令Step大為Impressive，Step自揭：「Elaine應該係有八至九成都係我嚟。」而在之後為Step改「情侶暱稱」環節，率先答題的Jaden及Isaac已給出冧爆答案，但威力卻不及Jacob的「楊枝甘露妹妹」！

雖然「楊枝甘露妹妹」聽落莫名其妙，但靈感來自Step《愛‧回家》其中一個角色，Jacob說：「我睇咗佢有一集《愛‧回家》，係佢喺吳多國嗰度做人哋Assistant，個角色叫楊枝甘露，嗰個角色令我覺得好冧，可愛得嚟又好純情。」

Jacob為了自己狂煲《愛‧回家》，Step坦言很窩心：「可能其他人係未必知（我有個咁嘅角色），嗰吓我會覺得係『得我一個知道你講緊咩』，我就有啲心動，我會覺得：『嘩！點解你會記得嘅？』，佢真係有留意李芷晴嘅嘢，我有嗰種被放咗喺心上嘅感覺。」

（即時娛樂）