連詩雅結婚生女後急速成長 學會享受平淡是福

連詩雅（Shiga）近日接受新城《原來生活好快樂》節目訪問，分享與丈夫陳家樂的相處之道，以及成為母親後的轉變。談及女兒陳星頤（Camila）快將1歲，她表示一家三口生活愉快，日常之中多了一個人陪她經歷。「結咗婚後我唔係一個人，遇到難捱事會容易啲捱。有咗BB後，人生多咗責任，唔可以咁任性執著，亦要懂得放下同珍惜。」

她透露與家樂之間沒秘密，什麼都會說，就算稍有磨擦，都會開門見山直話直說。「如果好嬲時面對面講唔到，我都會傳訊息講，我唔可以唔講，亦唔使你估，最憎玩估遊戲，所以我好鍾意我哋相處模式，佢對我好直接，我又好直接。」至於兩人最大的不同，Shiga笑指家樂有時略為執著，她就無所謂。「女都生埋，我幾睇得開，老公自己揀，同佢有小朋友又係自己想，點解仲要去傷大家感情？佢都好sweet嘅，會識做，因為我儀式感好重，以前一年慶祝10次，結咗婚有埋囡囡後，變咗一年3次，學識享受平淡之中嘅幸福。」

節目主持程凱欣和麥卓華讚她成為人妻及人母後極速長大，Shiga笑言：「都算係，但長大得太遲，用咗太耐時間達到依家較滿意嘅成長，以前停滯不前，又想長大又唔想長大，我好多時都童心未泯，但都係時候要成長，因為已為人媽咪。」

（即時娛樂）