G-Dragon澳門演唱會疑爆黑工風波　警查周邊產品賣場帶走多人

韓國男團BigBang成員G-Dragon（權志龍）世界巡迴演唱會澳門站昨（6日）起一連三日在銀河綜藝館舉行，吸引大批粉絲入場支持。然而，演唱會場外周邊產品賣場今日（7日）早上突遭警方大規模封查，多名職員被帶走。有消息指當中涉及聘用黑工。

多段現場影片在社交平台瘋傳，片中可見大批澳門警員進入場內，帶走十多名負責前台工作的職員，只剩下數人留守。拍片者留言：「賣賣下突然警察入嚟，帶走咗8成staff，唔知排到幾時！」、「排咗5個鐘終於買到，最後得10個staff收錢。」

有歌迷表示，警方行動疑針對黑工：「第一次見大型活動有警察衝入嚟捉黑工，仲要大部分係黑工。」亦有留言指出：「8:30嚟排，排到差唔多到突然有警察拉人，拉咗十幾個，而家得返四個收銀，現場幾千人排緊隊，四個人收錢真係CLS。」

有歌迷形容，現場一度陷入混亂：「10點開賣，10:52貨品仲齊，但買完唔畀走，閂晒門困住喺場內，話係警察查黑工。」另有人留言感嘆：「追星生涯買MD遇上警察捉黑工，轉個彎就到，門熄（閂）埋，以為無得賣。」

港新聞Instagram：https://www.instagram.com/kong.news/
港新聞Threads : https://www.threads.net/@kong.news