伍允龍李蔓瑩首次情侶檔現身活動 大方合照拒一同受訪

伍允龍與女友李蔓瑩今年5月尾公開戀情後，昨晚（22日）首次結伴出席公開活動，現身電影《神奇4俠：英雄第一步》在主題樂園舉行的首映禮，同場還有古天樂、C AllStar成員吳崇銘（King）、《中年好聲音3》劉洋等。兩人雖大方合照，但不肯一同受訪。伍允龍表示：「冇咩點解，因為之前冇夾口供。」提到他們的戀情最先在主題樂園被發現，今次重遊舊地感覺如何時，他說：「呢度係個開心地方，如果首映喺其他地方舉行都會去。去玩都會帶埋女友？大家時間夾到都會。」他表示公開戀情後沒壓力，可以名正言順約會，並透露雙方已見過家長。伍允龍說︰「屋企人對我嘅選擇有信心，只係冇諗到大家會咁好奇。」

他表示當日主動約李蔓瑩去酒店餐廳食飯，只是抱住交朋友心態，熟絡後就發現彼此價值觀相似，也有很多共同嗜好，自自然然便走在一起。伍允龍讚女友多優點：「佢性格好好，好善良，會遷就人，顧人感受。」他自言記性差，已預先跟女友報備，慎防忘記紀念日激嬲對方，同時用手機程式記下重要日子。提到他曾透露恨結婚，伍允龍表示會先繼續了解對方，同時努力掙錢。他說︰「掙錢可以做好多事，亦係一種保險。開咗工作室後，我更需要負責任。」被問到開戲會否找女友演出，他表示要視乎角色是否適合，不抗拒情侶檔接工作。伍允龍說：「拍拖係私人事，但明白我哋係公眾人物，觀眾會有興趣知更多，希望可以做到平衡，保留一啲私人空間。」

李蔓瑩表示分開受訪可以節省時間，盡快入場看戲。至於是否介意與男友一同受訪，她說：「要問佢同經理人，我係聽話嘅一個。」她稱公開戀情沒壓力，來到主題樂園一樣開心。談到與男友相識經過，她說：「初初約食飯只係聊天，大家都喜歡傾打機，未感受到佢追求。我性格好麻甩，但會記得紀念日。」提到伍允龍曾表示心急結婚，李蔓瑩說：「我唔知呀，冇傾呢方面。」至於會否組情侶檔工作？她直言：「我唔抗拒，但未聽到有邀請，要問經理人，叫男友安排演戲角色？冇，我較喜歡做主持。」對於有傳言指她曾介入駱振偉與丹麥籍太太的婚姻，李蔓瑩強調非事實：「駱振偉離婚，我都有慰問佢。我哋多次合作拍節目，傳緋聞已經冇反應。佢公開離婚前都有私訊我，擔心網民講我哋，所以幫我打好個底，叫我有乜事要回應都冇問題。」

吳崇銘（King）表示3歲兒子遺傳了其愛音樂的性格︰「佢經常同我搶錄音，我想幫佢出專輯。」C AllStar隊友梁釗峰捲入感情風波，拍拖4年半化妝師女友Karen分手後爆他出軌，King表示與釗峰有聯絡，但甚少談感情事，希望外間給予他空間。

劉洋、李金凱將於下月合作開騷，李金凱稱正在研究演唱會名稱︰「有兩個組合名字，『凱洋』或『劉金歲月』，我覺得『劉金歲月』唸起來較通順。」兩人預告將在演唱會上扮嘢，也有機會重現上次取消了的「互傳訊息」環節，讓大家睇到金凱用腳傳訊息的技能。至於二人會否改組合名以兄弟班陣容搵食？金凱笑稱睇緣分：「也許未來有一天劉洋已經過氣，我已經涼半截，我們會想到一個很不錯的名字，組合再出道。」

（即時娛樂）