葉蒨文遭GM指好「Kam」　關嘉敏晒貼紙相冇人認出

無綫戀綜節目《女神配對計劃》播出第12集，亦是《最後告白》推出前播出的最後一集！本集5位女神葉蒨文（Sophie）、李芷晴（Stephanie）、關嘉敏（Carman）、羅毓儀（Yuki）等，以及9位求愛勇者曾展望（GM）、林堡熙（Eddie）、林俊其（Kris）、黃家俊（Matthew）、細John（姜卓文）、陳衍丞（Kenneth）、海淦清（T.Max）、林焌堯（Jacob）、劉啟進（Matt）穿上校服，在兩位班主任林盛斌及黎芷珊帶領下，與3名神秘踢館者，上演一場「那些年，我們一起追的女神」。

本集除有火藥味十足的踢館情節，還有趣味性及資訊量十足的「女神過去常識問答比賽」，考驗9位求愛勇者及踢館者對女神的「感應度」。為了增加花生指數，問題分為「普通題」及「專屬題」，「普通題」是大包圍性質，一條問題針對晒5位女神，「專屬題」顧名思義是與5位女神個別自身有關的問題。

普通題問題包括：「有冇喺學生時期暗戀過人」、「喺學生時期，曾經同時畀5個或以上嘅人追求」、「成績表評語『條裙經常過短，嚴謹留意高度』」、「有冇試過畀人欺凌」、「有冇試過因為犯錯而見家長」、「有一位女神細個想做考古學家」。

眾多答案之中，場面最混亂竟是「考古學家」題，問題一出，向來口多多的GM即九秒九問：「呢啲咁Kam（意思係尷尬）嘅嘢邊個？」Kris即搶答：「好似係你嗰個（指Sophie）」，Sophie聞言扮嬲反擊Kris：「做乜話我Kam」。之後話完有呢個「考古學」想法好Kam的GM，答題時竟舉圓圈（意指佢認為答案主角是Sophie），令Sophie再遭Yuki搞笑「踩多句」:「GM都覺得你Kam！」被最愛GM列入「Kam系」的Sophie，最後放棄人生說了一句：「GM話最Kam係我」，GM見狀即補鑊：「唔係，你愛歷史！」似耍花槍多過玩遊戲。

至於五條專屬題中，Carman提供了一張中學時期與女同學影的貼紙相，問題是「呢張相入面邊個先係Carman」。但由照片「舊到模糊」，相中兩名女生的外表亦不似現時的Carman，結果令Matthew及細John同時陷入極大「黑人問號」，與Carman向來心意相通的Matthew亦投晒降：「我睇咗好耐，因為兩個都唔似Carman。」最終答案一出，不止參賽者，連幕後工作人員也為之嘩然。

另一條Sophie的專屬題，Sophie拿出了中學時期的美術作品—白色的八爪魚，問題則是隻八爪魚「點解係白色」。由於問題相當意識流，GM及Eddie亦分別將自己對Sophie的了解發揮得淋漓盡致，Eddie以八爪魚作品上有很多小鏡子作為解題着眼點，GM則以Sophie喜愛哲學作為思考根據。

東網網站 : https://on.cc/東網Facebook專頁 : https://www.facebook.com/onccnews/