娛圈單打︱疑似胸襲泰女神　呢個阿叔好身痕

中泰混血美女鄺玲玲不嬲係本欄心中女神，佢同女拍檔Orm演出《我們的秘密》、組成泰國最強GL CP後爆紅全亞洲，足證絕非池中物。最近兩女二搭，合演GL泰劇《Only You》，再度引爆話題。佢哋亦非常勤力跑宣傳，點知竟然出事！玲玲疑似被猥瑣阿叔胸襲！

話說「LingOrm」去到泰國三台一個節目做宣傳，呢個台係當地主要免費電視台，地位同香港大台差唔多。只見Orm跳上玲玲背脊，玲玲則配合背起Orm，本來大家笑到花枝亂顫好鬼開心，就喺玲玲雙手護實Orm、毫無防範之際，節目主持人竟然伸出兩隻手指、閃電督向玲玲左胸！然後再趁勢捉實玲玲玉臂唔放！美其名曰驚兩女跌親喎！

陰功豬！玲玲初時仲懵吓懵吓，但好快就Feel到唔妥，Orm亦隨即跳番落地，玲玲低頭一會再抬起頭，已見佢笑容變得非常牽強。胸襲視頻喺網絡廣為流傳，粉絲大表震怒，紛紛灌爆大叔嘅Threads同IG，鬧爆佢唔好再性騷擾玲玲！

喂，本欄反覆睇片，真係愈睇愈嬲，呢個大叔絕對唔似唔覺意，疑似係特登！事後有粉絲表示，類似事件已非第一次發生，玲玲每次上佢節目，例必被毛手毛腳，可怒也！身痕成咁，真係欠打！

嗱，呢位六旬大叔名叫Sorayuth，係當地知名主持及主播，同政商界人物稔熟。2017年曾牽涉非法挪用資金等罪名，被判入獄13年，2021年獲得赦免，出獄後旋即喺三台繼續出鏡，可知後台非常強硬。唉，人在江湖，身不由己，睇嚟玲玲只能有苦自己知！

東網網站 : https://on.cc/東網Facebook專頁 : https://www.facebook.com/onccnews/