譚俊彥懶理批評 唔介意被稱「狄龍個仔」待子女長大會減產 陪老婆享受人生

譚俊彥（Shaun）於無綫劇《麻雀樂團》飾演有情有義又搞笑的司徒久，角色因父之名，成為麻將館第二代老闆，現實中掛上星二代光環的他，雖然被誤解靠父親，但他否認因父之名而入行，相反爸爸狄龍不想他入行捱苦；貴為視帝的他對仍被人稱呼為「狄龍個仔」一笑置之，現階段懶理批評，只享受工作，最重要陪伴家人，已計劃待子女長大後減少演出，與太太環遊世界享受人生。

譚俊彥指加入無綫至今，今次算是首次參演喜劇，他說：「等咗好耐，成日都想演唔太認真角色，剛加入時拍古裝劇《天命》，個樣又生得似老竇，令觀眾覺得我為人係咪咁認真呢？被定型之後都係搵我演呢類型角色，做到自己都想笑下，又想畀大家笑下，尤其有小朋友之後，但唔係想，人哋就會畀你做，今次監製好好，可能見到我同角色有啲相似，安排畀我做。」

他認為與角色相似的地方，是父親傳承一些執着和老土給兒子，場景家中掛着家訓牌匾，現實中老家都掛著「吃虧是福」家訓，他說：「我演得有共鳴，本身都如角色咁，對後輩好吟沉，因為工作比較認真，唔係個個鍾意聽，好多人嚟玩，但對我來講，因為老竇係當演員養大我，我好尊重拍攝現場呢個地方，呢方面我比較執着，老竇都係咁，好多人會覺得佢講嘢『掘擂槌』掃人興，佢心地好好，真正認識佢就唔會驚，我哋倆父子都係一樣，個樣生成咁冇辦法。」

他直認和角色一樣著重親情和家庭，這亦是他決定搬返香港原因：「19歲入行後，喺世界各地不斷工作，到成家立室後，搬返香港，選擇加入無綫，做好呢份工，一做就做到𠵱家40多歲，最主要係陪老人家老去，計劃照顧到小朋友長大，我就減少演出，同太太環遊世界。」

由演出偶像劇、小生到中生，之後便迎接演老生，他對將來亦有所考量，「到時係咪仲有咁多劇集需要我呢？唔想有一日到我真係老，仲喺現場拖累人哋，所以我會叫老竇唔好再接拍咁多，早啲退休，就是因為人以前幾好記性都好，年紀大之後就冇咁弗，佢都聽我講減少咗好多，近10年都冇乜點開工，我覺得係好事，後生已經捱得咁辛苦，𠵱家用餘下時間湊孫，享受家庭樂。」

角色以父之名繼承麻雀館生意，但譚俊彥不認為自己是以父之名入行，「好多人對我有好多誤解，成日都覺得我嚟到無綫就做主角，唔係老竇有主角做？我加入前已入行10幾年，每個人背後都有自己一段故事，我喺無綫做咗10多套劇男主角，演出作品超過100部，𠵱家只會享受，唔會再去諗人哋講乜，反而心痛再後生啲嘅星二代，見到姜卓文（細John）畀人鬧，同我細個畀人鬧嘅嘢一模一樣，好心你哋班網民啦！有啲新意好唔好？」

他指星二代內心要夠強大，父親教導公眾人物要維持公眾人物應有態度。譚俊彥曾也因批評而放棄一些想做的事，他說：「我冇放棄過做演員，但放棄做歌手，曾經試過出唱片，最後係唔得嘅，都係好事，因為了解到自己真正強項，未必係唱歌，好多人天生唱得好好，我只係死練死背，𠵱家搵到最舒服做法，就是間中唱插曲，或搵我出嚟唱幾首歌賺錢，但唔敢再有歌手夢，費事畀人笑啦！」

至今仍有人以「狄龍個仔」稱呼他，但他並不介意，他說：「總之記得我就好好，好過唔記得，其實好閒，以前好多知道我老竇嘅人都已經可能老去，𠵱家好多調番轉，唔認識我老竇嘅，會叫佢做『譚俊彥老竇』，早前同佢出去食飯，有人問『譚生可唔可以影張相？』老竇整理時，原來對方想搵我影相，係有少少唔舒服嘅，我叫老譚生一齊影打圓場，雖然佔比率好少，不過間唔中都有一次。」

欲知專訪內容，請留意明天（24日）明報娛樂版。

（即時娛樂）