林盛斌代言快餐店再化身「營業部徐小姐」　自覺美女連男同事都話索

發布於 4小時前 • 二弟

林盛斌（Bob）向來喜歡扮鬼扮馬，繼早前以AI技術化身爆肌型男後，近日為快餐店代言拍攝宣傳照片，以AI技術度身訂造三款別出心裁的造型，包括麻甩貼地的「職安真漢Bob」、型英帥的「西裝Bob」，以及超省鏡的「營業部徐小姐」Look，就連男同事都話索。

Bob向來喜歡扮鬼扮馬，早前以AI技術化身爆肌型男。

Bob近日為快餐店代言拍攝宣傳照片，以AI技術度身訂造三款別出心裁的造型。

Bob直言今次過程開心又順利，最欣賞品牌的思維廣闊，懂得尊重及欣賞創意！「其實是我建議利用目前最流行的AI技術去設計三個不同造型，客戶也覺得這個想法相當有趣，事關大家可以去得更盡，創造更多可能性，發出更多笑料！」他又提到自己剛踏入社會工作時，為了省錢經常刻意不吃午餐，等到兩時許的下午茶時段才幫襯品牌的茶餐，因為經濟實惠、選擇又多兼好味。

超省鏡的「營業部徐小姐」Look再次出現。

數到最深得Bob歡心的造型，莫過於是反串扮女生的「靚女相」。「我最鍾意嘅一定係『徐小姐』嘅相，一嚟好多網友都對我當年模仿營業部徐小姐嘅照片念念不忘，二來OL Look令我驚覺自己原來係個美女，公司男同事睇到都笑都合唔埋口，讚我好索、好正，哈哈！」

取材自Bob當年模仿「營業部徐小姐」的廣告造型。

早前Bob又笑指自己比紅姐更吸引。

Bob說：「至於地盤工友嘅造型同樣有趣，甚有『職安真漢子』嘅感覺，如果我以呢個造型現身地盤，相信可以即時埋位開工，零違和感。而西裝Look都好有型，極具男神風采，令我有啲沾沾自喜，自覺可以追盡天下美女，哈哈！」

Bob又自誇地盤工友的造型同樣有趣，甚有『職安真漢子』嘅感覺。

Bob又笑指今次玩上癮，將來最想挑戰長髮王子造型：「我係有諗過正正經經留一次長頭髮，因為依家嘅光頭造型超級蝕底，有頭髮嘅話可以梳高，睇起嚟高了2、3吋，行出嚟更加有氣勢。而且我都諗過效法Tyson Yoshi操肌，但係時機未到，事關有太多高人同師傅告誡過我，如果變瘦咗就會失業，所以當有朝一日我唔愁衣食嘅時候，我一定會努力健身，誓要做一次『Bob Bob Yoshi』，大家放長雙眼睇啦！」