薛家燕力Sell「細John」 關嘉敏勁冧：我好鍾意佢㗎

無綫《女神配對計劃》其中一位女神關嘉敏（Carmen），接受新城廣播《開心大派對》訪問，甫開始，Carmen即被主持薛家燕及思敏追問關於《女神》問題，非常搞笑。

家燕姐劈頭八卦地問Carmen當初參加時，會否諗「係咪嚟真？」、「真係鍾意咗咁會點？」而思敏也插嘴追問「係TVB搵你？」、「還是內部公開招募？」

Carmen直言：「算係內部招募，當時拍緊樓宇短劇，監製導演知道我冇男朋友，問有冇興趣參加？我話都好喎！我已有3年冇拍拖，如果喺節目中搵到男朋友，就當係Bonus，講真，邊有咁易搵到男友呀？拍個節目就鍾意對方？當時純粹覺得想玩下，認識唔同男性朋友。」

家燕姐問現在是否已選了意中人？Carmen露出甜絲絲笑容，她豪爽說：「我好主動地揀咗姜大衛個仔細John（姜卓文），哈哈！」家燕姐甫聽到姜卓文名字，即開心到大叫並大讚：「佢係我世侄嚟，我同佢爹哋、媽咪好熟㗎，佢好乖仔，唔錯！」

Carmen聞言反應超興奮，更不顧儀態驚喜尖叫：「家燕姐世侄，我好鍾意佢㗎！細John未入圍時，已經睇中佢，但當時佢揀咗Stephanie（李芷晴），我好傷心呀！好唔開心！」

在傷心又不開心之際，好彩的事發生了，只要參賽者被多過1位女神揀中，就要反選，由該位參賽者揀其中1位女神，她把握機會向細John表白，她自豪說：「反選時，佢就揀咗我。」家燕姐馬上恭喜她，繼續大讚及力銷細John：「佢好有禮貌，事業有一番熱誠，父母又教得好，恭喜你呀！」

（即時娛樂）