公司逼我打籃球｜193靠乞人憎當選隊長 訂嚴規阻肥仔離場休息

ViuTV節目《公司逼我打籃球》今晚（27日）播出第5集，「愛晴當入樽」繼續迎戰應屆籃球聯賽冠軍「荃灣女子籃球隊」，但比數一度落後。曹梓冲（Agent L.）直言怕跟女將碰撞：「一開頭我都叫佢哋防守要出聲，hustle啲攞板，但當我落到去嘅時候，我明白點解佢哋唔敢攞，始終我哋好少同女仔打波，身體碰撞呢啲唔係藉口嚟嘅，人哋都唔介意，但係我哋都就住打。」

「愛晴當入樽」今集齊齊票選隊長，當選隊長的郭嘉駿（193）笑言：「有少少驚訝，我以為陳安立（Brian）會做隊長，因為Brian講嘢正常啲。」Coach Fui表示隊長的性格要「直啲」：「193有少少乞人憎，我覺得做隊長一流！」眾人大笑拍掌。Coach Fui補充：「因為佢要帶領球隊，有時醜人嘅角色係隊長做！」

193身為隊長，有權決定3條隊規加強訓練成效。他隨即訂立一條規矩，宣布進行任何訓練期間，無人可以離開球場，坐在一旁休息。Agent L.聞言立即拍拍經常會在場外休息的梁業（肥仔）。193補充：「大家一齊咁辛苦訓練，係為咗進步呀嘛！大家應該push自己，但如果你唔push自己走去休息就唔啱。我覺得你可以留喺場內，慢慢行又好，點都好，但就唔好走出場外。」

今集亦紀錄了「生啤盃籃球明星賽」24位參賽藝人的藍白組分組過程及賽前訓練。白隊的吳林峰完成訓練後分享：「今日望到啲隊友就覺得場波應該幾輕鬆，我哋有高度有顏值！」面對藍隊成員大多工作繁忙而未能齊人訓練，林奕匡不失信心：「我個人都少少好勝，我都希望我嗰隊贏，咁少啲練習一定係蝕底嘅，不過我哋啲人係勁！」

（即時娛樂）