黃劍文手指割傷 流血一刻諗起耶穌 需做手術：醫生話斷咗70%筋

黃劍文（Kimman）昨晨（26日）發生家居意外，手指被玻璃割傷流血不止，看醫院急症後更被強制留院，今天（27日）他在Ig拍片並交代最新情况：「雖然意外割傷咗隻手指，非常感謝大家嘅問候同祝福，多謝大家嘅關心同愛護，多謝醫護人員細心照顧。

琴日好快安排咗做手術，做完手術琴晚就出咗院，做手術嘅時候打咗局部麻醉，我感覺應該打咗兩支針喺隻手指度，打落去嘅時候感覺好似兩粒釘插住咗，因為醫生清潔同埋聯針，感覺上整咗好耐，所以喺做手術嘅時候，我瞓咗覺。

醫生話俾我知有70%筋係斷咗，所以佢幫我連針，固定手指唔俾佢郁，下星期就會返去複（覆）診，之後就會做物理治療，放心啦﹗我相信兩三個星期後會好返嘅，喜樂的心乃是良藥。雖然手指受咗傷，但係每一個問候每一個關心，都溫暖我嘅心，感激人間有愛。

呢句啱唔啱用呢？ 『因禍得福』，有時有啲嘢發生總有佢嘅原因，起碼讓我心靈上 ，有唔同嘅領受同埋得着，其實當我流血嗰刻，我諗起耶穌，我得到安慰，當我發現原來手指咁重要嘅時候，我更加學懂每一個肢體﹑每一個部份都係咁重要，甚至每一個人 都係有價值。」

（即時娛樂）