葉蒨文掙扎2揀1 指GM表現欠突出 被Eddie「旅行共享幸福論」攻陷

無綫戀綜真人騷《女神配對計劃》昨（27日）晚播出第8集，再有兩名求愛者被淘汰，分別是李芷晴（Stephanie）組的劉偉強（Issac）及因工作關係未能參與是次遊戲的10優醫生譚品堯。

昨晚「心意配對遊戲」結束後給出的驚人啟示是，曾展望（GM）及葉蒨文（Sophie）不但外形襯到絕，而且心意相通，在5條問題中，GM有4條中了Sophie選擇！

最後一條題目，Sophie三子同時Hit中女神心意，4人均認為假若自己1年後會死，最想做的事就是「跟最愛的人環遊世界」，除了林澤謙得一條鎖匙，GM及林堡熙Eddie均手持兩條，故Sophie「最後一Key」相當關鍵；Eddie亦在這關鍵時刻發表感人言論：「你應該知我鍾意旅行，我去咗好幾個地方都係自己去，喺嗰啲moment我發覺呢種幸福自己享受係爭咁啲，如果得番1年，我想同我最愛嘅人去一個旅行，將我睇到呢個世界嘅靚，去分享畀我鍾意嘅人、將我最後嘅開心留畀佢。」

Eddie說話真摯動人，Sophie雙眼通紅、扁嘴強忍激動，身旁的梁敏巧（Maggie）問Sophie「點解喊」時，Sophie嘆氣道：「我唔知呀﹗」說畢即忍淚，然後又嘆氣兼𢯎頭：「唉！好難揀呀。」

冷靜一輪後，Sophie坦言不會揀答中問題最少的阿謙，但當說到「如果GM同Eddie呢…」時，Sophie展露煩惱樣。Maggie即畀意見：「我覺得你隨心啦，最真實嘅感覺…」之後Sophie幾經掙扎終說出GM名字，GM險勝獲得與Sophie同房良機。

Sophie受訪時補充：「如果遵從自己內心，我係揀GM嘅，嗰啲火花係冇辦法可以忽略，但我又覺得GM朝早整體嘅表現，我仲未Feel到嗰種主動。」

昨晚Sophie與李芷晴（Step）及羅毓儀（Yuki）陪觀眾睇直播時，再詳細解釋了Eddie比GM優勝之處：「Eddie同我互動都好多，佢係好溫柔同情感細膩嘅人，第一日『正式』見佢（有見面傾偈），我已經Feel到佢非常了解我，佢有好多嘢問我前，佢已經有咗答案，如果我答中咗佢心目中嘅嘢，佢係會微笑點頭」、「嗰刻我覺得Eddie係更加細心體貼嘅選擇，GM嗰日表現唔算話好突出，但無奈地我個心又係偏向GM。」

話雖如此，當Sophie陪睇直播時，見到GM原來與自己一樣、因為各種心理負擔，無法好好享受最後一次親密遊戲時，又變回少女般喜悅；根據下集預告，GM在解決「分牀」問題時，又憑一句搞笑說話逗到Sophie笑逐顏開，看來後續GM與Eddie的競爭將會更激烈。

昨晚還有搞笑位，Sophie直播甫開始，即對GM贏得比女神還要多的支持Stickers大感氣結，更搞笑稱情况持續的話，她要退出《女神配對計劃》以示抗議，同GM一樣鬼馬。

（即時娛樂）