黃心穎早起肚痛作悶兼作嘔　惹大肚疑雲

藝人黃心穎相隔年半再次推出新歌，但剛巧碰上許志安將為BIG FOUR演唱會，時間上引起揣測。心穎早前接受HOY TV訪問講到每次推出新歌，心情也很緊張：「尤其係推出前兩個禮拜，每朝早起身都會有一種肚痛、作嘔作悶嘅感覺，真係好似有咗咁！但係到咗前幾日又好返喇喎，但係一諗到準備要宣傳，又覺得好攰喇！哈哈哈！」

講到新歌竟「棄用」丈夫泥鯭做監製，她笑言是故意：「因為我想搵一啲新人合作，有新嘅衝擊，咁當然佢都有偷偷指導我嘅，即係例如佢會叫我搵邊個做監製，畀啲guideline我，但就真係冇參與！而個MV到最後先有我個樣，我喺特登嘅，因為我唔想出鏡，我驚要拍好耐呀！同埋啲歌詞已經好直白，所以鏡頭就朦朧啲，隱晦啲，唔使咁直接。」

心穎分享創作新歌的時候，當時其實是處於心很累的狀態：「當時係冇乜自信，有啲迷失嘅感覺，但依家好多喇！因為識得點樣去面對，同埋調節情緒，唔可以畀佢影響到自己，當我面對唔好嘅情緒時，我會直接面對佢，唔開心就畀自己喊，如果覺得好煩嘅時候，就畀3日自己，之後就唔可以再頹落去喇！要畀一個期限，亦都唔好抑壓情緒，因為係咁累積落去，最後都係會爆，但係就算爆，我都唔會爆老公，因為佢嘅反彈力都好強下！哈哈哈！咁蠢嘅嘢我唔做㗎囉！ 」

心穎講到近年最美好的事，就是可以睡到自然醒，身邊人和寵物都身體健康，提到生B問題，她說：「如果呢一刻有，我會覺得好開心，如果冇，我又唔會覺得好缺失，以前我比較想做媽咪，但係到咗我依家嘅年齡，我連照顧自己都覺得好攰，如果再照顧多一個小朋友，我唔知我可唔可以應付到！」

東網網站 : https://on.cc/東網Facebook專頁 : https://www.facebook.com/onccnews/