王敏奕拍彭發作品「冇好日子過」　隨時接捧做鬼后

由彭發執導、張兆輝與王敏奕主演的《空心人》，以驚慄包裝，講述張兆輝與王敏奕飾演的夫婦失去愛兒後的虐心故事，帶出要珍惜家人，不要愛得太遲的訊息。

王敏奕自稱「唔嚇得」，自小怕看驚慄或恐怖片，問她為何會接拍《空心人》？她笑謂：「應該係導演點解搵我呢個演員？一直我都怕睇驚慄同鬼片，但讀書年代可以唔睇《貞子》都要睇《見鬼》，今次突然收到導演邀請有啲受寵若驚，作為演員當然好希望同咁有分量嘅導演合作，睇完劇本就覺得好感動唔使再考慮，係個不可多得嘅角色。」彭發則表示本來不認識王敏奕，最初是由張兆輝太太介紹二人認識，合作過後對她表現非常滿意：「佢絕對超標，亦包括張兆輝，因為開拍前我已經個別警告過，接呢部戲要有心理準備，過程會好痛苦，裏面情緒起伏、我要求要做到個效果，對演員嚟講係會崩潰。」

王敏奕亦笑指的確「冇好日子過」，透露當中一場失去兒子的場口很激烈，兩公婆要互相廝殺指摘，越愛越痛苦：「導演又要求好高想一鏡直落，自己真係110%投入俾心機演出。」她表示電影最初在馬來西亞開鏡時，雖未拍到自己戲份，但去探班時已感覺到張兆輝的功力厲害，互相打招呼當刻已很有老夫老妻的默契。

談到戲中不乏感情戲洶湧和爆喊場面，她笑指喊戲不難，導演不准他們喊才是最難：「導演要我掉晒啲嘢清空腦袋，引導我點樣進入演好每一場戲，係之前未試過嘅演出方式同思維。」彭發解釋說：「成個劇情睇完之後，返轉頭睇有啲對白、表情係唔可以有任何痕迹喺度，但演員已經睇晒劇本知道個結局，突然中間一段係知道要講呢句對白，背後有一個深層意思會喊住講，但在於我係唔可以，所以點解敏奕話喊唔係最難，係你想喊時我唔畀你喊呀，呢個係最難，好多時拍某場戲某個鏡頭，我真係撲出去講話『真係唔得呀你』，一有痕迹大家就知道後面發生咩事，咁樣先最難，所以我現場成日話你忘記咗你睇過個劇本。」他又指明白演員拍攝前對戲和培養情緒是很合理，但今次例外：「今次我話你哋真係唔好搞呀，唔好喺度懶勁培養情緒同對戲，因為對戲已經喊好大鑊，拍出嚟正式就做唔得返，同埋情緒準備咗一睇就知你會喊，咁就大件事，我就最驚咁樣，我好少遇到要咁去處理演員或者一場戲，但呢套戲冇辦法。」他笑稱每當發現大家匿埋，便會上前跟大家講其他事情要大家分心，王敏奕即笑指導演為此絞盡腦汁，要經常搞笑，所以拍得好開心。

她坦言除了一Take過那場口很難忘，另一場於紙紮舖的拍攝也同樣深刻難演，因為要演看到一些看不到的東西而作出反應，坦言現實生活中從未經歷過亦難以找借鏡學習：「拍到我投晒降，場戲又冇對白，施展渾身解數導演仲一直叫Cut，搞我好沮喪，都多謝導演冇放棄我。」另問到老公曾國祥拍攝前有否給予意見？她笑指沒有向老公問意見，彭發則表示曾國祥曾是《見鬼2》的副導演，一直看着他成長，更稱據知敏奕最初是不想接今次演出，是因老公向她指彭發是個好導演才令她改變主意。

談到彭氏兄弟曾捧出影后「鬼后」李心潔，今次會否有信心再捧出另一個「鬼后」王敏奕？彭發表示要交給觀眾去評論，認為只要大家有看過這兩部電影，一定會記得這兩位演員。談到張兆輝之前在訪問中透露拍紙紮舖場口後，他跟導演各自走出去爆喊，最初張兆輝以為因演得好令導演也投入，但後才知他因家中的事情所感觸，彭發承認當時自己也在苦難之中：「好多人話演員經歷一個情感係最好有真實個人體驗，我拍呢套戲特別呢場戲，導演都需要經歷唔同處境、唔同事情，處理方法都唔一樣，咁啱好多嘢砌砌埋埋，砌咗場戲出嚟，原來係要有嗰一個Moment先諗到有咁嘅一場戲同咁樣去處理，對我嚟講都係一個好意外嘅體會，原來世間上好多嘢一切都係最好嘅安排！」他坦言劇本就是因自己的經歷才寫得出來，問何引起他寫出這場傷感戲？他坦言不想多說：「都過去咗，活在當下啦！」提到張兆輝表示導演曾對他說這部可能是「遺作」，彭發説：「當時太太患病中，一個人病自然會諗到生離死別，心情係覺得仲有冇機會？嗰一刻嗰場戲係寫緊呢一樣嘢，有當日經歷嘅處境先寫到呢一場戲，簡單講導演都要投入。（依家仲有冇咁嘅想法？）冇啦，我仲喺度，仲籌備另一部新戲，其實當時都有一個想法，作為一個導演睇到依家個電影市場，都係拍得一部得一部，每次都係以『遺作』嘅態度去處理一件事，並唔係自己諗唔開！」提到彭氏兄弟繼《逃出生天》後已未有再有合作，彭發坦言有片商接洽自己和哥哥彭順，明白市場上都期待他們再度合作拍戲，若遇到合適題材和項目會考慮一下。

東網網站 : https://on.cc/東網Facebook專頁 : https://www.facebook.com/onccnews/