吳若希望老公勿添麻煩　譚輝智未曾捲金錢糾紛

藝人吳若希今晚（9日）出席無綫籌款節目《星光熠熠耀保良》擔任表演嘉賓，講到被控拋煙頭出車外事件，她指事件好無厘頭，直到記者通知她才知要上庭，因為去年幾乎全年在內地拍劇，無可能發生拋煙頭事件：「搵律師上庭連罰款15分鐘便差不多使了一萬元，如果唔認罪要證明自己無故的話，花的錢要多幾倍，所以今次惟有食死貓。」

問到是否老公拋煙頭？她稱不知道亦沒有去研究，但直言頂住條氣：「頂住，所以我不停講，不過香港法例係咁冇辦法。」問她是否犯太歲？她即謂不關自己事：「你問何生（老公何兆鴻）啦！上年7月9號我出咗段貼文，話何生車女同事，7月11號就發生掉煙頭事件，唔知佢借車畀同事揸，定係車同事，都唔出奇。（你有冇私下追究佢？）追究咗，你睇今日見唔見何生出現？希望佢以後平平安安，長命百歲，唔好再帶咁多麻煩畀太太就Perfect，80歲前都唔好再發生呢啲事。」

《中年好聲音2》歌手譚輝智與古淖文今晚（9日）出席籌款節目，同是「中2生」的朱博文近日被爆拖欠去年開騷時演出樂手的薪金，兩人表示沒有留意，古淖文稱：「我之前忙做內地巡演冇留意，估計係小事，我以前參加比賽時係獨立音樂人，所有錢銀都係自己傾，問過前輩意見，所有關於錢都會寫得好清楚，唔想因為錢而有誤會，傷感情。（會唔會搵朱博文了解吓？）人哋嘅事唔好參與咁多，望事件快啲完結。」譚輝智自言未試過因為錢銀被走數，問到做生意時有否跟人發生過金錢糾紛？他直言：「未去到錢銀糾紛咁嚴重，有時找數係會有快有慢，可能會遲畀，但對方應該唔係故意。」

另外，提到明天是《中年好聲音4》的海選，他們均指未有聽到有身邊有朋友參加，古淖文說：「我冇收到朋友話參加，可能唔想打擾我，我有叫澳門粉絲參加，佢哋冇回覆，如果唔參加就好可惜，相信有嘅。」而譚輝智就指當年自己也是靜悄悄參加比賽，未有告訴任何人。

東網網站 : https://on.cc/東網Facebook專頁 : https://www.facebook.com/onccnews/