娛圈單打︱冇腳雀仔終結婚　可憐炮友輸鑊甘

52歲南韓青龍影帝鄭雨盛，去年驚爆跟年輕索模文佳庇「搞出人命」，影帝要仔唔要乸，拒絕結婚，只肯出錢撫養兒子，引發舉國狂轟。呢鑊嘢對影帝形象造成極大打擊，搞到佢要趁住做頒獎禮嘉賓之際，上台公開道歉。

說時遲，那時快，私生子風波落幕不久，鄭雨盛呢隻冇腳雀仔終於安定下來。韓媒踢爆，佢跟拍拖多年嘅圈外女友最近低調完婚。有指鄭太一直非常忍得，對另一半耍耍滾隻眼開隻眼閉，更喺爆出私生子爭議後不離不棄，陪伴鄭生走過低谷，因而獲得頑石點頭，迎娶為妻。

嗱，呢啲咪叫患難見真情囉。大家都知，呢位影帝油頭粉面，姿姿整整，但勝在高大靚仔有演技，一直被視為師奶殺手，深受大韓民國中女歡迎。佢亦樂得做鑽石王老五，跟圈外女友拖而不婚。殊不知，影帝私生活混亂放蕩，竟然同一個聲稱只係見過幾次面、短時間交往嘅炮友仔都生埋，搞到被全國女人聲討！

今年本應有套劇出街，拍檔仲係「好好人夫」玄彬添，但遲遲未有聲氣播放。為咗唔好累街坊，兼且還是覺得女友最好，呢隻冇腳雀仔終於同意結婚。之不過，婚訊傳出後，又輪到文佳庇被網民「鞭屍」，嘲諷佢搞咁多嘢，最後都係得個吉！大韓民國男尊女卑，男人只要喺偷食後表現出悔意，兼且有「正印」包庇，過咗海就係神仙！受盡批評嘅往往都係女人，認真唔公平！

計本欄話齋，亂搞男女關係、始亂終棄都唔緊要，反正（當時）男未婚、女未嫁，但搞出人命就唔同講法。小朋友係無辜的！家庭不完整，對身心點都有影響。

東網網站 : https://on.cc/東網Facebook專頁 : https://www.facebook.com/onccnews/