自爆被史泰龍送車送樓力追 　彭美拉堅稱冇講大話

現年58歲的加拿大一代性感女神彭美拉安德遜（Pamela Anderson）最近被傳與73歲荷里活男星里安納遜（Liam Neeson）因合作新片《神探零零甩》（The Naked Gun）而傳緋聞，近日更有傳他們計劃同居。出名桃花旺盛的拉姑2023年曾在自己的紀錄片中大爆鮮為人知的情史，其中她踢爆當年史泰龍追求她。

當時拉姑表示龍哥曾提議送名貴跑車及公寓大廈給她，而條件就是要成為他女友。消息傳出後史泰龍即時透過宣傳人員否認。最近，拉姑於清談節目中「舊事重提」，她堅稱自己冇「吹水」：「喂，你（龍哥）點可以話冇？我意思係我都非常具體咁講啦。」主持人Andy Cohen搞笑問：「佢唔認架車牌子啫！」拉姑即時笑問：「係囉，唔通係另一個牌子嘅車？梗係唔會啦！」

東網網站 : https://on.cc/東網Facebook專頁 : https://www.facebook.com/onccnews/