連詩雅缺乏安全感　幸與陳家樂修成正果

藝人連詩雅（Shiga）近日接受電台訪問，為產後復出的新歌《人生使用說明》宣傳。Shiga與老公陳家樂因2019年拍攝旅遊節目《12個夏天》而結緣，Shiga指當時都各有伴侶，故沒想太多。及至翌年陳家樂邀請她上網上節目，適逢二人同時回復單身才開始約會。談及陳家樂最初吸引她的原因，她說：「係純品，有咁上下樣貌嘅男仔，多數係花花公子。但佢反差好大，佢好老派，係夜晚要聽收音機瞓，朝早飲茶睇報紙嗰啲！佢叫飯可以日日食同一款男人飯，同我最初想像嗰啲男人好唔同。而佢仲有種傻氣，我亦欣賞佢嘅傻氣，畀到我穩定、同佢一齊好有安全感。」Shiga形容陳家樂的浪漫就是給她放心，「對於我，就係好浪漫。譬如佢去邊，他會自動自覺話：『我到喇！我做緊乜呀！』我從來無話要check住佢，但係佢好願意分享畀我聽，我就覺得好浪漫。」

拍拖兩年已讓她感覺陳家樂能付託終生，原來是源於二人曾因疫情分隔兩地三個月，Shiga坦言：「我超級討厭Long D，但疫情最嚴重嘅時候，我好矛盾要返內地拍劇三個月。但嗰三個月，佢令我完全放心，嗰時我哋靠facetime見，佢會特登約我拍完劇各自返到屋企，一齊打開facetime食飯，臨瞓又開住facetime揀一套戲一齊睇。真心覺得佢唔使做呢啲嘢，但係咁，佢就令我好安心。佢知我係一個缺乏安全感嘅人，佢就畀呢樣嘢我，而佢咁有耐性做呢件事，就令我諗到佢係一個可以結婚嘅對象。」

至於婚後不足一年就成功懷孕，Shiga直認是計劃亦是意外：「係想有小朋友，所以無特別避孕，但無諗過咁快、咁順利！」Shiga指自己生理期一向不準，大懵至懷孕兩個多月才醒覺要驗孕：「最初仲以為感冒頭暈，係兩個幾月先試吓驗。發現真嘅時候，係好surprise。」她更指陳家樂得悉自己要當爸爸時，不如外間想像般激動：「嗰日佢放工返嚟，我嗰刻好開心又有好多情緒，佢一開門我就爆喊，佢即刻問我：『乜事？做乜事？』我喊住話：『你做爸爸啦！』佢好冷靜話：『咁咪好囉！我哋係想有小朋友嘛。』或者當時太突然，佢無太大感受，係隔咗幾日佢陪我去產檢，當佢睇到個mon，再聽到BB『噗噗』嘅心跳聲，佢就流眼淚，我哋兩個都一齊流眼淚。」

Shiga不諱言首胎就是想生女，不過老公以前恨生仔：「佢想同囝囝一齊做運動，但因為我哋屋企有一對狗狗係一仔一女，佢好嗲個女，就話有個女都係好sweet。」剛產後復出的她被問到是否暫沒計劃追多個？她說：「我自己隨緣，老公係想，佢想有個囝囝，佢成日講笑話：『唔生啦，除非下一個係仔啦！』但唔係你計劃就有，真係隨緣，我依家係學識去感受同活在當下。」

東網網站 : https://on.cc/東網Facebook專頁 : https://www.facebook.com/onccnews/