姚焯菲月尾赴美升讀大學　自爆積極籌備新歌

月尾就離港到美國入讀紐約大學的姚焯菲(Chantel）今日（9日）到尖沙咀演出音樂會，她表示成為美國流行天后Lady Gaga、Taylor Swift師妹感慶幸，兒時已知學校非常優秀，望教Lady Gaga、Taylor Swift的老師仍在，又指今次修讀為期4年的Music Business課程，主要學習音樂理論、編曲，其他有關音樂知識及推廣，認為現時的歌手不單止要識唱歌，還要跟潮流去迎合市場。

對於要離開處境劇《愛·回家之開心速遞》劇組，Chantel透露12月放聖誕假時返港會繼續拍攝，現時劇情會交代返回澳洲。問到升學4年可擔心會影響事業？她指之前到新西蘭2年讀書時，情況也一樣，但所有fans及傳媒都愛錫自己，會留意她的新動向，所以不太擔心，也籌備新歌中，可能會在美國錄音。

她又說升學期間，有長假必返港，問她美及港兩邊跑可感辛苦，她說：「係辛苦，但冇辦法，想兩邊兼顧，都想返嚟見大家。」不過她笑言從前很愛搭飛機，現變成搭飛機是件很攰的事。

Chantel指在出發前發覺很多電器，因電壓問題在當地不能使用，今年會先住學校宿舍，因想認識更多新朋友。問她是否想識男友？她最初表示不想，但又謂要睇緣分，也不會刻意搵男友。問到離港前是否會相約「聲夢」歌手好友食飯？她指工作已排滿，亦要跟不同人食飯，今晚也跟他們見面。

同場還有女團Beanies，成員潘釗彤（Chiutung）及黃健怡（Winky）因合約問題離隊，張天穎（Jaime）、陳樂頤（Georgina）及李凱翹（Kay），今日由5變3姿態演出音樂節，Georgina接受訪問時表示：「其實之前我哋3個做過幾次School Tour，我哋5個成員有2年，依家3個成員就走位唔同啲，要啲時間習慣。」Jaime就覺得現時演出較多空間，至於Kay表示自己適應能力較慢，所以要較長時間調節。

雖然兩位成員離隊，但3女表示見面時仍有打招呼，還會互相祝福及尊重她們的決定，Georgina指：「經了解過佢哋係同經理人喺合約上有意見分歧，所以佢哋主動終止合約，我哋3個仲有合約，同埋想繼續以Beanies身份去做嘢，佢哋都有自己音樂路，希望大家用唔同方式去支持我哋5個啦。（會唔會加番成員？）暫時冇諗過。」問可有勸兩位成員毋離隊？3女表示：「我哋冇用勸呢個字眼，佢哋咁大個人，有自己選擇。」有謂現時少了成員，酬勞可分得更多，Jaime則說首先要有更多工作才可。

談及Jaime男友ANSONBEAN病愈復出後拍戲，但被拍到和Anson Kong當街拖手被取笑出現「第三者」，她扁嘴謂：「點算呀？（平時會唔會同你十指緊扣？）睇心情啦，呷醋就唔會，我呢排都忙工作，放佢出去啦。」不過她覺得男友有戲拍是好事，可令他更有目標，心情更輕鬆，大讚男友用心：「同埋佢做好多功課，為咗個角色要瘦，絕食咗5日，又睇好多戲又上堂，（可擔心佢壓力大又病過？）佢好叻仔，學識咗人情緒有高低，知點樣轉一個方式去應對，識見步行步，佢好珍惜工作。」

「中年好聲音3」歌手張與辰透露將於17號假麥花臣舉行首個個人演唱會，他表示已開始排舞，並透露當晚將以4個不同造型示人，很期待感受以不同裝束配襯不同歌曲表演，開心門票於開售10分鐘售罄。

他透露已請了女前輩擔任個唱特別嘉賓，但現要保持神秘。問會否是葉蒨文？他說很喜歡及愛聽她的歌，大讚她雖不擅長中文，卻能完全唱出中文歌意思及唱得很好，不過自己請不起她。他又稱期待盡快擁有更大型個唱，因想嘗試踏上有升降台及有機關的舞台。

東網網站 : https://on.cc/東網Facebook專頁 : https://www.facebook.com/onccnews/