鄧麗欣慶祝歌迷會成立18年感動落淚 宣布澳門個唱加開1場

鄧麗欣（Stephy）日前與逾260名粉絲聚會，慶祝歌迷會「STEPHY FANTASIA」成立18周年。大合照時，Stephy感動落淚，她說︰「真係好感觸，歌迷陪住我一齊成長，有啲係喺度認識、拍拖，仲生埋小朋友，成件事係好得意。大家一齊成長，就好似大家一齊生活咁，所以今次特別感觸同開心。今年應該係咁多年最多人嘅一年，大合照時嗰刻突然好感觸。好多人話我寵粉，其實我都唔係為咗寵幸佢哋而做啲乜嘢。大家咁支持我，我會有動力做得更好，見到佢哋開心我就會好開心。」

現場歌迷不時高呼，稱十分期待Stephy在澳門舉行的9月演唱會。歌迷會特意設計扭蛋遊戲為演唱會應援籌款。Stephy幸運抽中大獎，更將行李帶獎品掛上身，扮選美冠軍繞場一周，樂在其中。

《STEP by STEPHY鄧麗欣演唱會澳門站2025》前天優先訂票火速售罄。Stephy在歌迷會活動上宣布加開9月21日場次，本月16日進行優先購票，門票公開發售日期稍後公布。Stephy表示：「今年3月香港演唱會得到歌迷喜愛，並且能移師到澳門演出，真係好開心同感恩。我上次做足200分，今次要做到300分！上次無敵風火輪打咗2個圈，今次會唔會挑戰3個呢？哈哈，大家拭目以待！目前要為澳門演唱會同拉闊音樂會做好準備，身體健康係最緊要，依家開始要保養身體，注重飲食、休息同運動，保持自己體態。」

首次到澳門開騷，Stephy期待萬分，她透露將會有驚喜彩蛋：「澳門睇騷就睇得多，今次去搞演唱會，係有少少不知所措，因為對個場地有啲陌生，好彩喺香港run咗一次，所以冇咁緊張，但就未想像到會係點。不過，咁樣係幾好玩嘅！我會盡可能送驚喜畀大家，考慮加入上次冇唱嘅歌曲，希望帶畀大家新鮮感。仲有冇新元素？大家入場就知道。」

談及澳門的最難忘經歷，Stephy說：「最難忘係我人生第一次跳Bungee jump（笨猪跳）就係喺澳門，當時係全世界最高嘅Bungee jump，跳落去嗰一吓未知，到依家我仲歷歷在目，未跳過嘅人真係唔知咩叫腳軟！澳門嘅美食都好正，葡撻、椰汁雞麵、海鮮… 開騷前唔食得，開騷後留喺澳門玩，就會食番夠本！」

（即時娛樂）