VIVA出新歌互揭其短　難忘南韓受訓爭拗

英皇女團VIVA推出新團歌《不夠浪漫的我們》，4位成員姜咏鑫（Ada）、 張鈊貽（VALC）、李晞彤（Carina）及馬思惠（Macy）日前接受訪問，分享出道1年的成長過程，自爆成員之間的意見分歧不時發生，但反而覺得嗌交可增進了解，將矛盾轉化成磨合，其中Macy更是「吵架擔當」，先後「辣着」VALC及Ada，幸好隊友間從沒隔夜仇。

VALC記得和Macy最深刻一次「吵大鑊」是在韓國受訓時，兩人為揀舞蹈爭拗而面左左，VALC謂：「我哋喺韓國受訓時間唔係好長，所以我想揀隻勁啲、難跳啲嘅舞，但Macy就覺得要揀隻穩陣啲嘅，依家我明白佢嘅諗法，但當時就覺得點解佢同我諗法唔同。」Macy解釋明白隊友想完成有挑戰的舞蹈，但仍投反對票自有原因：「想我哋一出道就被認同，將最好狀態呈現畀大家睇。」雖然兩人各持己見，但最終和氣收場，Carina說：「當時由我做和事老氹番佢哋，隻舞就將難度同穩陣結合。」而爆開有癮的Macy自揭早幾日在車上又「唔妥」Ada，她說：「係為咗啲無聊嘢，總之各有意見，佢講出嚟我又唔順氣，覺得佢唔啱要話番佢，但一落車又冇事。」問到Ada及Carina見隊友鬧交可成磨心，兩女異口同聲謂：「唔會，只會笑，以前就會屈埋啲氣，但依家見得多咗，會直接將開心講出嚟。」

問到4女可有互相不滿之處，Macy第一個舉手投訴：「我最憎Carina着高跟鞋，我依家對鞋裏面有兩層增高鞋墊。」Ada及VALC表態同意，因Carina是隊中的高妹，Carina就指是被安排：「造型師畀對高啲鞋我，有時我對鞋高啲，影相時就專登烏低身就番大家，佢哋唔係羨慕我，話覺得我好大隻，搞到高好似係缺點咁。」Ada插嘴說令她不開心是以為自己也有高跟鞋着，結果因襯衫關係只收到對平底鞋：「我矮咗Carina半個頭囉，我喺佢隔籬變咗小婑人。」VALC又笑言站在Carina身邊不怕蝕底，但感覺很奇怪，和Ada及VALC高度相近的Macy就話特別高的Carina:「佢好似一條筍咁。」

至於Macy就有「失憶症」問題，其他3位成員齊聲指她如活在另一個空間，Carina更直言：「初時我以為佢『玩嘢』，但其實佢好獨立，生活好有條理，只係同我哋一齊先至係咁。」Ada更曾懷疑Macy是「選擇性失憶」，但原來是：「佢根本睇唔到，我哋要再開一個電話新群組提醒佢。」被笑到黃面的Macy也自知有問題：「我真係要食啲維他命，我成日唔記得，我唔係解釋，可能我有近視睇唔到你哋嘴型，但有時我真係聽唔到。」

另外，Macy爆Ada的缺點是「有床氣」：「佢早上瞓醒時，說話會倔啲。」VALC和Carina則不滿Ada「省話」：「佢唔係唔覆，而係好短，譬如ok，佢只覆k，連o都冇，令人誤會佢嬲，想快啲離開Group。」而Ada就解釋：「文字可能係溫暖嘅嘢，但對我嚟講係壓力，我見到咁多字會驚，因為唔知係咪鬧我，我寫信會喊，但語音就冇問題。」最後要數VALC時，3女幾經思考後就大讚VALC：「佢好疏離，但依家進步咗好多。」VALC亦認同自己屬慢熱之人，所以予人冷漠的感覺，但相熟後也很平易近人。

Hair：

Jeremy Wong @myos_hair

Kelvin Liu @myos_hair

Taka Chung @myos_hair

Makeup：

Cyrus Lee

Davina Cheung

Outfit：

ithk @i.t_too

Venue：Ladygourmand、@ladygourmandhk

東網網站 : https://on.cc/東網Facebook專頁 : https://www.facebook.com/onccnews/