女神配對計劃︱關嘉敏激讚　年薪200萬追求者憑「狗」突圍

無綫戀綜《女神配對計劃》昨（29日）播出一集有關嘉敏（Carman），而其中一名男嘉賓是年薪過200萬i-banker黃家俊（Matthew），在當中一個回合中需要參賽者親近Carman的愛犬Two Two，Two Two二話不說奔向Matthew，事後Carman亦對Matthew讚不絕口：「佢好勁呀，要留住Two Two好難，仲要停留兩分幾鐘喎，有愛心，唔會差得去邊。」

憑「狗」突圍的Matthew，在話題方面亦是與Carman最投契，因二人均曾任職模特兒，Carman講到當年為了賺學費兼職模特兒而本末倒置的歲月：「我嗰時做Model係因為我唔想靠屋企，主要係賺錢交學費，但我成日走堂，走到老師同我講，Carman你記住，學生先係 Full Time喎…我廿歲頭已開始捱眼瞓，成日都捱夜，因為自己鍾意做呢行。」

此外，Carman又向對方自揭一段極不愉快的生日經歷：「我每年生日正日都會同屋企人食飯，我有叫我前度啦，首先佢遲到！佢遲到唔緊要嘅，可能天氣唔好啦，然後上到嚟佢開始黑口黑面，然後我問佢做咩，佢就話冇嘢呀！我媽夾啲蝦喺佢碗度，我幫佢剝、擺埋喺佢碗，我話：『你快啲食蝦吖』，『得喇，我自己嚟啦』。我細細聲同佢講：『你快啲食，我媽望住，唔該你呀、求吓你呀』。」

Carman邊說邊重現前度當時的「晦氣食蝦樣」，續說：「佢食得好晦氣，我成個過程覺得好唔舒服。咁食完飯切蛋糕啦，我阿媽話買咗個好靚嘅蛋糕，跟住好開心話有靚蛋糕，話要搽唇膏影靚相好Hyper，但佢就態度惡劣咁回應：『唔影呀！』跟住佢走咗，佢真係走咗呀，然後，我望住個蛋糕係咁喊，跟住我切蛋糕時係喊住切。真係一個好有回憶嘅生日。」令網友大讚Carman容易相處及真性情：「Carman 幾爽，男仔頭性格，同佢拍拖冇咁多麻煩嘢」、「佢幾真，做女朋友同朋友都一流」、「有女朋友為自己剝蝦，感受到愛意」。

節目結尾預告有網民期待已久的李芷晴，雖然芷晴現身節目的時間只有13秒，穿上純白色低胸裙的她仙氣滿瀉，加上超長美腿，相當吸睛，獲網民熱捧為「TVB 第一靚女」。

東網網站 : https://on.cc/東網Facebook專頁 : https://www.facebook.com/onccnews/