梁釗峰分手前受訪讚女友　認大男人要女伴：肯講對唔住

現年38歲的C AllStar成員梁釗峰近日被前女友爆疑出軌，撰長文澄清分手非因第三者，更自爆曾想逃避輕生，引發網民熱議。梁釗峰分手消息曝光前的電台訪問今日（12日）出街，他在訪問中除了剖白轉做自資獨立歌手的原因，更難得大談感情事，而在接受訪問後一周，他與前女友於上周先後證實這段關係分手收場。

梁釗峰今年四月離開合作超過13年的娘家寰亞，日前推出首支獨立作品《情緒價值補給員》，他在訪問中自認有惰性，想趁仍是「三字頭」闖下，亦坦承為跳出安全網感到忐忑，他在C AllStar年代比其他兄弟跑得快，及至近年被隊友陳健安或是同公司的馮允謙超前，被問到離巢與同公司歌手之間的競爭有沒有關係，他表示：「我無諗咁多，成功嘅公司，如果你配合到係天時地利人和，打橫瞓都會紅，啲歌都會OK，我真係無咁諗。」至於兄弟安仔有今天的成績，釗峰一直戥兄弟高興：「C AllStar時畀人感覺我突出，因為《天梯》，又或者個人發展我派歌快啲。組合嗰陣會在意啲，或者會有比較，因為大家同一起步點，除咗想兄弟有掌聲，亦想啲掌聲落響自己度。但到2017年休團獨立之後，我打消晒呢啲念頭，會真心戥兄弟開心。」

提到馮允謙或安仔已成功開了多次個唱，釗峰亦表示真心為好友高興：「好記得安仔疫情開咗一個無觀眾嘅網上騷，我響廠睇佢嘅騷，到中尾段，我係畀佢感動到流眼淚，大讚佢『好叻仔呀！』絕對無諗點解佢會開騷先。同佢經歷咁多，真心覺得佢啲歌好聽，嗰刻我亦覺得自己大個仔咗。」至於馮允謙，原來入寰亞後，二人亦成為了好兄弟，他透露稱對方為細佬：「Jay Fung呢個兄弟同C AllStar有啲唔同，我會稱呼佢係細佬，我緊張佢嘅成績，仲著緊過其他兄弟。我哋係傾偈擔當，係大家嘅《情緒價值補給員》，會互相比意見。譬如之前我計劃獨立離開，佢成日陪住我，認識Jay Fung，係我入寰亞不可多得嘅事，多咗個little bro。」

感情事一向低調的釗峰，早前被揭地下情，事緣其拍拖四年半的圈外女友無預警於社交網上載多張親密合照，之後有報導猜測二人關係「見光死」。節目中，釗峰大談吸引他的異性條件，他說：「最重要心地善良，同埋肯講對唔住，一個肯講對唔住嘅人，係對我有好大吸引力，因為會顧及人感受。」他指女友很吻合：「佢好肯講對唔住，一開始已經好了解我，大家會代入雙方思考，會考慮人哋點諗。我哋唔會隨便發脾氣，只要唔動氣，大家就無事，我哋成日傾呢啲嘢。」

至於女友Po相令關係曝光他有沒有嬲？他在訪問中澄清：「我又冇！真係冇！反而會同佢傾如果呢個階段你想公開，just go ahead。只係後來收到朋友電話話啲相太過親密，先至知咁做或者會影響外間觀感，就同佢講唔好再post啦，反正大家都知道喇。」釗峰除了承認事件沒影響二人關係外，亦直認自己大男人。他一直把關係低調處理，只是想保護這段戀情，「大男人？我算呀！我係大男人，因為我驚無能力照顧我身邊嘅人，所以我要逞強！我唔係要你乜都聽晒我講，但我驚你唔聽我講而出咗事，咁我就保護唔到你，我會仲擔心。因為佢唔係圈內人，扯咗佢入嚟，我會好難保護對方。」快「男人40」的釗峰，亦因大男人主義所以未有結婚計劃，「我成日認為事業要達到一個點先會諗（結婚），因為未能夠畀到一個穩健、舒適嘅空間畀你身邊嘅人，所以就唔會諗住。」現階段，釗峰坦言只想專注勇闖其自資獨立歌手的路。奈何訪問後一周，釗峰女友於網上先稱失望搬走分手，釗峰隨即網上回應證實分手消息。