裕美搞「集體招親」喪Sell義賣品　林作突襲露股罅

藝人裕美早前舌戰男友林作前度麥明詩，狂轟對方擺林作母親上枱，行為如「賊喊捉賊」及為流量講大話等，而麥明詩至今未見在網上作任何回應，然而裕美近日又有新搞作，聲稱將公開「集體招親」，在社交網的短片中，講明7月11日37歲生日舉行「相睇」大會，又大讚借出場地的負責人相當靚仔。

不過裕美所指的「招親」派對，並非對人而是針對毛孩，她希望在生日正日及翌日大搞有意義活動，為20多隻流浪貓狗物色新主人，亦為被遺棄的毛孩籌款，她呼籲：「到時免費入場，多謝靚仔提供場地，同埋嗰日唔好送生日禮物畀我，想送不如幫襯買由我親自設計嘅T恤及布袋啦。」

不愧為「最強KOL」的她喪Sell由她設計的義賣品，聲稱用料上乘，兼且印有可愛貓貓狗狗，而精粹之處在於T恤背面的衫尾位印有狗狗熨畫：「着住呢件衫行喺街上，個個都會望住你個屎窟。」隨即拉埋被稱呼為「叉燒」的男友林作入鏡，穿上跟裕美同款T恤的林作，和女友齊齊拎轉背ShowT恤背面衫尾位時，扭身扭勢的他突然露出股罅，其搶鏡機心，路人皆知。　

東網網站 : https://on.cc/東網Facebook專頁 : https://www.facebook.com/onccnews/