胡敏芝爆喊自責不孝　嘆爺爺夢未圓：佢最想睇我做戲！

「無綫小花」胡敏芝憑清純樣貌和甜美笑容，獲「小薛凱琪」稱號，更由綜藝成功跳入拍正劇，於《麻雀樂團》中佔戲甚重，總算向屋企人有所交代，不再反對她入行，當提到最支持她追演戲夢的爺爺與世長辭，未能看到她的作品面世，痛心劬勞未報，忍不住痛哭。

藝人胡敏芝於無綫熱播劇《麻雀樂團》中，飾演視帝譚俊彥妹妹「程晴」，與謝東閔有感情線，戲中不乏親密錫錫場口，其中一場戲謝東閔孭着酒醉的她，混亂中錫了東閔臉珠，她笑說：「嗰度係長命斜，東閔孭住我行到身水身汗，好彩冇嫌棄咋！我錫咗佢5次先成功，一係錫得太輕力，一係錫得唔夠耐，好搞笑！」敏芝與東閔年紀上有點差距，為了拉近年紀，不想太baby face而決心減磅，由原本45公斤輕磅型，減至40公斤超輕磅身形，認真用心良苦。

大學畢業第一份工作便入電視台，讀訓練班後直接加入J2做主持，拍過不少綜藝節目，如《搵鬼去電視城》、《冇人性教育》、《不正常愛情研究所》和《荷蘭Pop Guide》等，到近期她與農夫主持的《旅行最緊要近》，入行4年漸漸被觀眾認識，胡敏芝很感激監製提攜：「我未表現到自己嘅價值，人哋就投資喺我身上，好似賭博咁，因為我隨時搞到一鑊粥！所以好多謝監製畀好多意見我，教點做更好。」以前J2戰友近日都跳入劇組，包括陳若思和廖慧儀等，她直言大家感情要好，從來不會比較，只希望大家都好。

敏芝公開透露有個拍拖7年的圈外男友，是大學時的初戀對象，拍拖至今對感情非常專一，指與男友價值觀相同，否則不能相處下來：「拍戲係我鍾意嘅嘢，希望伴侶可以體諒，佢暫時幾支持我想做嘅嘢。」又笑言屋企人經常叫她「快點辭工」，不過看完《麻雀》後，嫲嫲終於改觀，她說：「嫲嫲比較傳統，唔會太讚，平時睇到我嘅演出都不予置評，昨日我打畀嫲嫲佢話過得去，叫我繼續努力，好開心。」出身於單親家庭，由爺爺嫲嫲湊大，兩老是她最親近的人，原來年前爺爺不幸離世，提到爺爺是一直最支持她追夢的人，她忍不住痛哭：「好Sad，一年前爺爺走咗，從無經歷過一個咁親嘅親人離開，覺得人大咗就要面對，所以更錫嫲嫲，一講就好傷心，我好不孝，爺爺咁支持我，我又冇拍任何嘢畀佢睇，佢最想睇我做戲。」

場地：形（Katachi Bar & Kushiyaki）

東網網站 : https://on.cc/東網Facebook專頁 : https://www.facebook.com/onccnews/