林盛斌化身「三面型Bob」　反串Look激似「營業部徐小姐」

藝人林盛斌（Bob）近日為大快活拍攝宣傳照片，早前以AI技術化身爆肌型男笑爆一眾網友的他，再以AI技術度身訂造3款別出心裁的造型，包括麻甩貼地的「職安真漢Bob」、型英帥的「西裝Bob」，以及超省鏡的「營業部徐小姐」Look。

數到最深得Bob歡心的造型，莫過於是反串扮女生的「靚女相」，他笑說：「我最鍾意嘅一定係『徐小姐』嘅相，一嚟好多網友都對我當年模仿營業部徐小姐嘅照片念念不忘，二來OL Look令我驚覺自己原來係個美女，公司男同事睇到都笑都合唔埋口，讚我好索、好正，哈哈！」Bob續說：「至於地盤工友嘅造型同樣有趣，甚有『職安真漢子』嘅感覺，如果我以呢個造型現身地盤，相信可以即時埋位開工，零違和感。而西裝Look都好有型，極具男神風采，令我有啲沾沾自喜，自覺可以追盡天下美女，哈哈！」

向來喜歡扮嘢的他笑認今次玩上癮，將來最想挑戰長髮王子造型：「我係有諗過正正經經留一次長頭髮，因為依家嘅光頭造型超級蝕底，有頭髮嘅話可以梳高，睇起嚟高了2、3吋，行出嚟更加有氣勢。而且我都諗過效法Tyson Yoshi操肌，但係時機未到，事關有太多高人同師傅告誡過我，如果變瘦咗就會失業，所以當有朝一日我唔愁衣食嘅時候，我一定會努力健身，誓要做一次『Bob Bob Yoshi』，大家放長雙眼睇啦！」

東網網站 : https://on.cc/東網Facebook專頁 : https://www.facebook.com/onccnews/