林子祥葉蒨文結婚近30年 公開情人節趣事兼家傳退燒秘方

林子祥（阿Lam）與葉蒨文（Sally）近日接受查小欣YouTube頻道訪問，分享時隔27年再合作開演唱會原因。兩人分享婚後共度的最難忘情人節，Sally又公開為丈夫退燒的家傳四寶。

訪問前夕，阿Lam身體抱恙，Sally感覺老公發燒，立刻出動家傳四寶，令阿Lam重拾健康。她說：「我好細個識得刮痧，我好容易熱氣、成日中暑，舅母幫我刮痧，佢幫我，我就識咗，會用一支匙羹，加橄欖油、鹽、好熱嘅熱水。佢（阿Lam）噚日燒到38度，我一摸知道佢好熱，先刮3條喺條頸度，條頸最緊要，一刮即刻鬆晒！」阿Lam搞笑道：「佢報仇咁報！」

阿Lam外表看似浪漫，Sally卻說：「我啱啱嫁佢1、2年嘅情人節，我等佢送禮物畀我，佢冇，我話今日係情人節，然後佢喺雪櫃搵咗個雪糕、插咗支蠟燭，話每日都係情人節，祝我情人節快樂！」阿Lam愛吃甜食，雪櫃常備義式雪糕；Sally則十分注重健康，平日隨身攜帶維他命，又遍尋降低膽固醇的秘方。Sally說：「人哋話佢（阿Lam）嘅膽固醇高，咁我點樣幫佢減低膽固醇呢？原來係亞麻籽。佢食，我不如食埋，我嘅膽固醇都唔會高，大家一人一個湯匙，但我成日唔記得！」

明年是阿Lam與Sally的結婚30周年，兩人預計會在舞台上度過。Sally說：「之後可能會做巡迴，會分開年幾兩年做，目前我哋首先做好香港呢5場！」談及演唱會歌單，阿Lam氣定神閒地說：「我哋多歌仲易『襯』，將啲歌分一個一個類別，例如電影歌、中式歌。你講咩歌，我哋都有，就將佢哋『襯』埋，一嚿嚿直落去唱！」Sally問阿Lam：「我哋好多都係合唱嘅歌，我可以唱你嘅歌，你有冇唱我嘅歌？」阿Lam飛快地答：「《零時十分》！」至於可會唱《選擇》，Sally說：「嗰時我唔係好知道《選擇》歌詞講乜，只知道歌名係《選擇》，但過咗咁多年，如果以前嘅『選擇』係我同佢，依家嘅『選擇』係我哋同舞台、觀眾，係一個大好多嘅愛，唔係咁窄嘅範圍。」

被問到為何時隔27年再合作開騷，阿Lam細說箇中原因：「咁耐冇一齊做騷，我諗係因為佢好長時間要照顧爹哋媽咪，之後輪到我照顧媽咪，所以時間夾唔埋！」今次演唱會，兩人與主辦單位商討近兩年，合約足足有28頁。主力處理合約的Sally笑言：「真係暈，好在我哋有一個非常厲害嘅律師，因為咁多年我哋都冇乜簽合約，今次有咁多場、去到咁遠，所以有必要簽！」Sally是緊張大師，力求精準；阿Lam看似慢條斯理，其實亦有注重細節的地方。 阿Lam說：「我諗我同佢嘅進度係好唔同，因為我放鬆晒來做，我可以用唔同方法去唱呢隻歌，覺得咁樣先至係創新，唔係困住自己，佢就要每一粒音、每一盞燈、每一樣嘢都要啱晒，所以我哋咁耐冇一齊做演唱會！」

（即時娛樂）