關嘉敏驚訝細John被爆追空姐網紅CoCo：我選擇相信佢

藝人關嘉敏（Carman）與歌手黃洛妍今日（22日）出席科技活動擔任頒獎嘉賓。問到Carman對科技和電子產品是否很有研究？她笑言：「依家比以前好，細個更加差，隨住時代進步係方便咗同一定要識。」她笑言中學選科時，在家政和電腦科中，她選擇了家政，因此對IT一頭霧水，提到可找個精於科技的男朋友替她處理？她說：「其實我夢寐以求個男朋友係十項全能，可以幫我換燈膽、煮嘢食、處理電子嘢同幫我睇埋文書，十項全能正，我嫁畀佢！（《女神配對計劃》入面有冇？）原來真係好難搵，唔怪得我單身，哈哈！」她表示《女神》中的男生也是各有所長，相處久了發現他們有不同吸引之處：「細John（姜卓文）煮嘢食好叻，細John正呀！好似我爸爸，因為我爸爸係廚師，所以一見到佢就諗起我爸爸，哈哈！」她笑言只是從片段中看過對方的廚藝，仍未試過對方手勢，但透露對方有提過希望找機會一起拍煮食片。

談到另一位求愛者Matthew（黃家俊），Carman則表示對方能給予她情緒價值：「唔知點解同佢好有緣分，每次出活動、拍攝會唔小心襯咗套衫，覺得同佢心靈上會照料到，佢對電子同文書都好叻，又有教書，佢都係幾吸引。」問到兩位男生中會選擇誰做男友？Carman笑言叫大家留意節目，自己不願劇透。

談到本月24日是她31歲生日，問到細John有何表示？她透露《女神》中有幾位男生也表示要約她吃生日飯，笑言時間難分配，會考慮連同幾位女神一大班一起聚餐。提到細John早前被爆背着她力追空姐網紅Coco，Carman坦言看到報道後起初很驚訝，但仍然選擇相信對方：「同佢拍攝嘅時候覺得佢係好真誠嘅人，我唔知真定假，當一段新聞咁睇，同埋都相信節目組，唔會咁跣我嘅，搵個唔係單身嘅嚟配對，佢哋都想我拍拖嘛！」

黃洛妍坦言平日少追看電視，但也有看過幾集《女神》，平日主要將時間全放上音樂事業上，其餘時間則陪家人，同樣單身的她，被問到會否有勇氣參加「配對」節目？她坦言絕對沒有問題，問到想找個怎樣的男生？她説：「要叻、醒目，心底裏要善良，呢樣嘢對我好重要。」她認為外表會隨時日而變化，故不太着重對方外貌，反而內心深處才是細水長流，自稱單身已一段時間的她，表示不抗拒但亦不會刻意追求：「時間到自然會到，雖然我好努力，但對所有嘢都好佛系。」她笑指對《女神》中的三角枱聚餐環節很有興趣，覺得會很好玩。

東網網站 : https://on.cc/東網Facebook專頁 : https://www.facebook.com/onccnews/