人手短缺｜醫生網發千字文爆公院4大苦況！向港人致歉：我都唔想三分鐘睇一個病人

人手短缺｜公院醫生：對唔住，我哋會再努力。香港公共醫療長年人手短缺，加上移民潮的衝擊，令公院醫護壓力爆煲。有自稱公院醫生的網民近日在社文平台懺悔，指「我都唔想三分鐘睇一個病人」，直言他們不是偷懶，而是現時制度規定時限內一定要「清曬佢」，不然會阻礙下一個部門、當日手術等時間。他更剖白公院醫生現時有4大難處，向香港市民致歉。撰文：Ray@Medical Inspire │ 圖片來源：shutterstock

人手短缺｜醫生網發千字文爆公院4大苦況！向港人致歉：我都唔想三分鐘睇一個病人

近日有自稱公院醫生的人在IG以「對唔住，我都唔想三分鐘睇一個病人」發文，指上星期曾出現「衝症」情況，78分鐘內診治了14個病人，形容當時自己都覺得好恐怖。他亦表示，曾聽過最令他不開心的說話不是「我要投訴你」，而是「等就三個鐘、睇就睇得三分鐘」。

為此，他向所有曾因此不滿的港人致歉，「對唔住，令到你覺得好似得唔到應有嘅醫療照顧。」但他同時解釋，這現象自己也不想及憎恨，指他們不是「hea睇」，而是因為所有公院醫生都有下列4大慘狀：

1.）人手不足

每一節門診會有一定數量病人預約，例如四個醫生，但有一百個病人，惟要在規定時間內完成所有診症，「我地可以做耐啲唔食lunch，可以遲收工，但其他現實條件會迫我地嗰個時間內要清曬佢。」他解釋，由於時限後有另一個部門要用房、醫生要開會、手術等情況，因此當僅醫生「有責任準時清曬佢」。不然會令其他同事遲放工，或會有病人等到鼓譟而投訴。

2.）追趕門診進度

他表示，用三分鐘診症並不是偷懶，而是在燃燒自己的「小宇宙」，追趕門診的進度，幫輕同事的壓力，「我睇得慢，講得白啲，就係free ride緊我其他同事，迫佢地睇得再快啲，再唔係就會變成一齊攬炒，等到最後一個鐘，每人見到仲有十個牌板係枱面，先黎一齊狂衝。」

3.）快速理解病史、簡單向病人講解病情

其實看診見前，醫生會用一分鐘理解病人病歷背景，一分鐘整合病史，一分多鐘檢視所有報告，再用僅餘的時間思考如何向病人解釋。而診症時的「3分鐘」，則是用三十秒簡介自和對病人身份證號碼，當中更同時觀看掃瞄影像，以確認放射科醫生報告的說法，最後再向你解釋治療方案。他表示，自知很多病人都會覺得他們沒有為病人做詳細的檢查，直言西醫倚重客觀化驗、影像，所以即使未開始看診，醫生們亦都心中有數，自知要為病人做什麼的檢查和問診，「即使你覺得我用得三分鐘睇你，我其實係挑戰緊用前後八分鐘去理解你嘅前世今生，然後點幫你嘅未來。」

4.）預留「寶貴時間」予重症病人

最後，他解釋最重要的原因是，自己永遠不會知道下一個病人「會唔會係大鑊嘢」，需要盡快開刀做手術。而此時，他則會堅持預留時間，慢慢及詳細地與病人講解最新病情，務求令他們有心理準備接受「bad news」

「我有得揀可能同你傾一個鐘都唔過份。」

他為此再次道歉：「各位病人，委屈左你，對唔住，我地會再努力。」而分享上述難處，並不是找藉口，反之是知道醫患關係好重要，希望減少雙方的誤會，「大家都同一屋簷下，係呢個大家都知道搖搖欲墜嘅公營醫療危樓之中，無論醫生護士病人，都多啲互相了解體諒，針對返制度問題嘅根本，或者就會好少少。」