關嘉敏細訴極不愉快生日經歷 遭前度惡意「摧毁」爆喊

《女神配對計劃》昨（29日）晚播出第4集，本集與組員進行「三角枱約會」的女神，則有第三集已出場的關嘉敏（Carman）及梁敏巧（Maggie）。

Carman望落十足傻大姐，但骨子裏還有感性及自強一面。在與Matthew（黃家俊）一起湊狗仔Two Two的甜品時間中，被Matthew體貼及溫柔感染的Carman，決定打開心扉向Matthew細訴極不愉快的生日經歷：「我每年生日正日，都會同屋企人食飯，我有叫我前度啦，首先佢遲到！佢遲到唔緊要，可能天氣唔好啦，然後上到嚟佢開始黑口黑面，然後我問佢做咩，佢就話冇嘢呀！」

Carman續說：「我媽夾啲蝦喺佢碗度，我幫佢剝、擺埋喺佢碗，我話：『你快啲食蝦吖』，『得喇，我自己嚟啦』。我細細聲同佢講：『你快啲食，我媽望住，唔該你呀、求吓你呀』。」Carman邊說邊重現前度當時「晦氣食蝦樣」：「佢食得好晦氣，我成個過程覺得好唔舒服。咁食完飯切蛋糕啦，我阿媽話買咗個好靚嘅蛋糕，跟住好開心話有靚蛋糕，話要搽唇膏影靚相好Hyper，但佢就態度惡劣咁回應：『唔影呀！』、『做咩唔影』、『唔想影咪唔影咯』、『點解唔想影呀？』、『我都話唔想影咯，唔影呀！』跟住佢走咗，佢真係走咗呀！（邊說邊抱頭）然後，我望住個蛋糕係咁喊，跟住我切蛋糕時係喊住切，真係好有回憶嘅生日。

即使分享傷心往事，但Carman很快回復歡樂，並笑指自己炮製了「爛Gag備忘錄」逗自己開心：「我唔開心嘅時候，就會拎出嚟睇令自己開心。」

節目結尾預告，有網民期待已久的李芷晴（Stephanie），意味著下一集主角就是她！雖然李芷晴現身節目時間只有13秒，但她身穿白色低胸小禮服後仙氣滿瀉，加上超長美腿及純真表情，獲網民熱捧為「TVB第一靚女」。

（即時娛樂）