老咗點算好？財庫局局長轉行賣廣告　大sell退休法寶

香港人口愈趨老化，財經事務及庫務局局長許正宇藉出席活動「賣廣告」，講緊嘅係強積金同埋「HKMC退休3寶」，將積極推廣銀色財務同保障措施，幫長者善用財富同理財工具，提升退休生活後嘅財務保障。

許氏坦言，香港面對住人口高齡化呢個不可逆轉嘅趨勢，據政府統計處數據，65歲及以上長者人口比例，預計由2021年嘅20.5%，升至2046年嘅36%，即係到咗2046年，大約每3位香港人就有一位長者。不過，香港唔少長者有一定財富積累，為銀髮經濟發展提供基礎，政府視透過全面政策同措施，幫助長者有效管理財務資源，確保喺退休後能享有穩定嘅生活及充足嘅經濟保障為目標。

佢提到，強積金係香港退休保障嘅核心支柱，截至去年年底，全港由60歲及以上人士持有嘅強積金帳戶約有150萬個，總資產達1,800億元，佔強積金總資產14%。為提升強積金投資效益同靈活性，政府同強制性公積金計劃管理局(積金局)持續擴闊投資選擇並改善回報。現時強積金計劃已引入預設投資策略(DIS)，可以實現環球分散投資、自動調整風險水平，收費仲設上限，係便捷又易用嘅長期退休儲蓄方案。

佢指，去年6月推出嘅積金易平台，簡化行政流程，大幅提升運作效率、降低行政成本，更有助完善養老金融產業鏈，仲呼籲未下載積金易流動應用程式人士盡快下載添！

講起退休法寶，又點少得外匯基金旗下香港按揭證券公司2021年年中推出嘅「安老按揭計劃」、「保單逆按計劃」同「香港年金計劃」呢3寶。許氏指，3寶可助市民將多年努力工作而儲下嘅「磚頭、保單、存款」變為「長糧」，為退休生活提供靈活且穩定嘅收入來源，填補市場缺口，仲以提供即時、穩定同終身收入為目標，協助長者管理退休後嘅財務風險。

話時話，呢3寶推出以來成績唔錯。截至今年6月，安老按揭計劃累計批出逾8,400宗申請，每宗平均每月年金約1.62萬元，借款人平均年齡68歲，超過一半申請者選擇終身收取年金。香港年金保單數量約1.15萬張，總額按年增長四倍至約54億元。不過，同未來嘅人口數字一比，缺口似乎都幾大，睇嚟局長要賣多幾次廣告至得啦！

東網網站 : https://on.cc/東網Facebook專頁 : https://www.facebook.com/onccnews/